სტატია გამოქვეყნდა ინტერნეტპორტალ Etaloni.ge-ზე 2020 წლის 19 იანვარს
იმ პრაქტიკოსი მასწავლებლების ბედი, რომლებმაც სტატუსის ამაღლებისთვის ყველა სავალდებულო აქტივობა გაიარეს, მაგრამ ვერ დააგროვეს საჭირო 19 კრედიტქულა, აქამდე გაურკვეველი იყო. თუმცა როგორც Etaloni.ge-ს მასწავლებელთა პროფკავშირების პრეზიდენტმა, მაია კობახიძემ განუცხადა, ამ პედაგოგებისთვის გარდამავალ დებულებაში უკვე შესულია ცვლილებები და მათ მიეცემათ მეორე შანსი.
გასათვალისწინებელია ის ფაქტი, რომ ამ მასწავლებლებს გამოცდების ხელახლა ჩაბარება არ მოუწევთ, რაც, კობახიძის თქმით, მათი უფლებების დარღვევა იქნებოდა; სამაგიეროდ, ვისაც დააკლდა ნახევარი, 1 ან 2 კრედიტქულა, მათთვის მასწავლებლის სახლი გამოაცხადებს 4-კრედტიან ტრენინგპროგრამას და მისი წარმატებით დაძლევის შემდეგ, მასწავლებლებს მიენიჭებათ უფროსის სტატუსი.